شوبير يدافع عن توروب: «الأهلي يحتاج للاستقرار.. مش كل هزيمة تعني تغيير المدرب»

وجّه الإعلامي أحمد شوبير، حارس مرمى الأهلي ومنتخب مصر السابق، رسالة قوية إلى جماهير القلعة الحمراء، محذرًا من موجة الهجوم العنيفة التي طالت المدير الفني الدنماركي ييس توروب في الساعات الأخيرة، مؤكدًا أن الحكم عليه في هذا التوقيت غير منصف على الإطلاق.

وقال شوبير، خلال برنامجه الإذاعي صباح اليوم الاثنين: «سيبوني أتكلم بصراحة، جماهير الأهلي ليها حق على النادي ومش بتسيب الفريق، لكن مش طبيعي إن كل مدرب يخسر نغيره، كولر خسر من صن داونز في نصف النهائي مشي، وبعده جه عماد النحاس وخد الدوري، لكن الناس قالت عايزين مدرب أجنبي».

وتابع: «جابوا ريبيرو الإسباني، الراجل غير طريقة اللعب، وتعادل في مباراتين وخسر واحدة، وقدّم أداءً رائعًا ضد بورتو في كأس العالم، وبعدها خسر من بيراميدز فبدأت الضغوط واتقال إنه لا يصلح، فمشي، ورجع عماد النحاس واترفض تاني، ودلوقتي توروب مدرب كبير جدًا ولسه في بداية مشواره، مش ممكن نحكم عليه بالشكل ده».

وأضاف شوبير بنبرة حادة: «إيه كل شوية نغير مدرب؟! الأهلي عمره ما كان بيتدار كده. في ناس بتلعب من جوه النادي وبتستغل الغضب لصالحها. لازم مجلس الإدارة يقف وقفة حقيقية ويقول لأ. الأهلي عمره ما كان بيتأثر بالضغط الجماهيري في القرارات المصيرية».

وأوضح شوبير أن «مجلس الأهلي لا يدار إلا من داخله، والجمهور له كل الاحترام، لكن مش كل كلمة على السوشيال لازم يبقى وراها قرار».

واختتم حارس الأهلي السابق حديثه قائلاً: «الأهلي محتاج استقرار. عادي تخسر بطولة أو بطولتين، لكن التغيير المستمر في المدربين واللاعبين بالشكل ده خطر كبير. لازم الإدارة لما الحملة تشتد تقول: استوب، الأهلي أكبر من كده».